ორის საფეხბურთო კლუბს ,,დილა’’ შინაგან საქმეთა სამინისტრო მიხედავს.
აღნიშნული ინფორმაცია კლუბის ახალმა ხელმძღვანელობამ დაადასტურა. რა ფორმით
მოხდება ,,ზრუნვა”, ჯერ-ჯერობით უცნობია. შიდა ქართლის საინფორმაციო
ცენტრისთვის კი ცნობილია, რომ ყოფილი გუბერნატორის ზურაბ არსოშვილის
ინიციატივით, გორის ,,დილას” და მის სტადიონს საკმაოდ სოლიდური თანხა
მუნიციპალიტეტის 2011 წლის ბიუჯეტიდან გამოეყო. კერძოდ, სტადიონის ინფრასტრუქტურის განვითარებისთვის 59 700 ლარი, ხოლო საკუთრივ გუნდისთვის 581 800 ლარი. შინაგან
საქმეთა მინისტრი ვანო მერაბიშვილი კი კლუბით, 2011 წლის 27 ნოემბერს,
ზურაბ არსოშვილის გადაყენებიდან 2 თვის შემდეგ, დაინტერესდა.
გუნდი, რამდენიმე წლიანი პაუზის შემდეგ, უმაღლეს ლიგას 2011 წლის
ზაფხულში, სამტრედიასთან მოპოვებული გამარჯვების შემდეგ სწორედ არსოშვილის
პერიოდში დაუბრუნდა.
გარდა ფინანსური გარანტიებისა, ზურაბ არსოშვილმა კლუბში საკადრო
ცვლილება განახორციელა. შეიცვალა ხელმძღვანელობა. ,,დილას” პრეზიდენტად
ზვიად შერმადინი (გამგებლის მოადგილის ვანო ხორგუაშვილის მოყვარე)
დაინიშნა. ვანო ხორგუაშვილი კი (ყოფილი ,,დილელი”) არსოშვილის მეგობარია,
ისიც ფეხბურთის სფეროდან. ზურაბ არსოშვილიც ამავე დროს ყოფილი ფეხბურთელია.
პარალელურად, გუნდის მთავარ მწვრთნელად გია ცეცაძე დაინიშნა.
2011 წლის 14 სექტემბერს, რეგიონიდან არსოშვილის წასვლის და
მერაბიშვილის ფეხბურთით დაინტერესების შემდეგ, შეიცვალა გუნდის
ხელმძღვანელობაც. პრეზიდენტის შტატი გაუქმდა.
,,პრეზიდენტი აღარ ჰყავს ,,დილას”, ამჟამად არსებობს კლუბის დირექტორი,
რომლის მოვალეობასაც მე ვასრულებ. ძირეულ ცვლილებებს, ჯერ-ჯერობით,
ფეხბურთელების შემადგენლობაში არ ვგეგმავთ. თუმცა მწვრთნელად საკმაოდ
კვალიფიციური კადრი გვეყოლება’’. – გვითხრა ,,დილას” დირექტორმა ზურაბ
დალაქიშვილმა. მის მოადგილედ მამუკა ვარდოსანიძე დაინიშნა, ხოლო მთავარ
მწვრთნელად თბილისიდან გიორგი მახარაძე ჩამოიყვანა. ის წლების მანძილზე
საქართველოს სხვადასხვა რეგიონებში საფეხბურთო კლუბებს ხელმძღვანელობდა.
მეორე მწვრთნელი კი გორელი ზვიად სოღოლაშვილია.
ახალი ხელმძღვანელობის მოსვლის შემდეგ, გორის ,,დილა” პირველ შეხვედრას 7
დეკემბერს გამართავს, ამჯერად ზუგდიდის ,,ბაიას” საკუთარ მოედანზე
უმასპინძლებს. ამ დღეს გაირკვევა შსს მინისტრის ზრუნვის შედეგიც.
ავტორი: Guest |
ნანახია: (3303) დამატების დრო: (2024-03-29)
|
|
|