ორი ვარიანტი გვაქვს: 1.ნაღდი თამაში იყო; 2.სცენარი თამაშამდე იყო დაწერილი;
ზოგადად,
მესამე ვარიანტი ბუნებაში არ არსებობს, მაგრამ არსებობს საშუალებები,
რითაც შეიძლება ცუდი "რაღაცების" გამრავალფეროვნება და დაჯერება.
დავუშვათ,
რომ ნაღდი თამაში იყო და მივყვეთ მატჩის მსვლელობას. პირველ ტაიმში
"სპარტაკი" მეტოქეზე უკეთ გაისარჯა და ორი გოლითაც დაწინაურდა. "დილა"
სუმბურულად უტევდა, "სპარტაკი" კი მწყობრად თამაშობდა, ბურთს
მოწინააღმდეგეზე კარგად აგორებდა.
კონსტანტინე გაბაშვილმა ოციოდე მეტრიდან ააცილა კარს. საჯარიმოში შეჭრილ გიორგი კახელიშვილსაც
გაუცუდდა მიზანი - პირველ გოლამდე საინტერესო სხვა არაფერი მომხდარა. გოლი
კი "სპარტაკმა" მრავალსვლიან, მოხდენილ კომბინაციას მიაყოლა - ლაშა ჩაფიძემ ხელსაყრელი პოზიციიდან ზუსტად დაარტყა.
"დილამ" მეტოქეს მწვავე შეტევათა ჯერი მიაყოლა. რევაზ ჯიქიას ჰქონდა კარგი შანსი, მაგრამ კახა ალადაშვილის ჩაწოდებულზე თავური გიორგი ნადირაძის ხელებს "დაუმიზნა".
"სპარტაკს" ანგარიშის გაზრდა 33-ე წუთზე შეეძლო - ბადრი ტეტუნაშვილის დარტყმას სიზუსტე ოდნავ დააკლდა. ნომინალურმა მასპინძლებმა მეორე გოლი მალევე გაიტანეს - თემურ შარაშენიძემ მარცხენა ფლანგიდან ისე ჩააწოდა, "დილას" მეკარე და დაცვა შეცდნენ და ჩაფიძემაც დუბლი გაიფორმა.
"დილა"
მწვავე და აგრესიულ შეტევებს აგრძელებდა, რასაც ცოტა ქაოტური ელფერი
დაჰკრავდა. შესვენებამდე გორელებს ერთი გოლის გაქვითვა მართებდათ - ირაკლი ლექვთაძის დარტყმა კარში გიორგი ნადირაძემ არ შეუშვა.
შესვენების
შემდეგ "დილამ" უფრო შლეგად შეუტია, "სპარტაკმა" კი ბურთზე კონტროლი
დაკარგა და თამაში, ფაქტობრივად, მოედნის ცალ მხარეს მიდიოდა. ნადირაძემ
ერთხელაც იყოჩაღა და ილურიძეს არ დაანება გოლის გატანა. ჩინებული შანსი
ჰქონდა მათე ვაწაძესაც, ვისაც ახლო მანძილიდან დარტყმა გაუცუდდა.
გაუთავებელმა ზეწოლამ შედეგი მაინც მოუტანა გორელებს - ვაწაძემ ხვეული დარტყმით შორეულ ცხრიანში მოათავსა ბურთი.
მეორე გოლის გასატანად "დილას" დრო საკმარისად ჰქონდა და ასეც მოხდა - ნაკუთხურალ ბურთს გიორგი კახელიშვილმა შეაგება თავური, ნადირაძის მოგერიებულზე კი გიორგი ილურიძემ ისარგებლა - 2:2.
ყველაფერი ისე დამთავრდა, როგორც მოსალოდნელი იყო - "დილა" ზედა რვიანში მოხვდა.